Разгляд касацыйнай скаргі Алеся Бяляцкага адбудзецца 24 студзеня
Касацыйная скарга Алеся Бяляцкага на прысуд суда Першамайскага раёна будзе разглядацца калегіяй суддзяў вышэйстаячай інстанцыі 24 студзеня. Пачатак – а 10-ай гадзіне. Менскі гарадскі суд знаходзіцца па адрасе: вул. Дуніна-Марцінкевіча, д. 1/3 (ст. м. "Спартыўная").
Справа была перададзена ў Менскі гарадскі суд 6 студзеня.
Адвакат Алеся Бяляцкага накіраваў скаргу ў Менгарсуд 29 лістапада.
Нагадаем, 24 лістапада суддзя Першамайскага суду Менска Сяргей Бандарэнка абвясціў прысуд віцэ-прэзідэнту Міжнароднай федэрацыі правоў чалавека, старшыні Праваабарончага цэнтру “Вясна” Алесю Бяляцкаму: 4,5 гады ўзмоцненага рэжыму з канфіскацыяй маёмасці. Паводле рашэння суду, Бяляцкі таксама мусіў сплаціць у якасці кампенсацыі “шкоды, нанесенай злачынствам” 721 мільён рублёў і 36 мільёнаў рублёў дзяржаўнай пошліны.
