У Стакгольме прайшла нон-стоп акцыя салідарнасці з Беларуссю
Марцін Угла чытае тэкст Алеся Бяляцкага
19 снежня з 12:00 да 24:00 на найвялікшай плошчы Стакгольма “Medborgarplatsen” прайшла нон-стоп акцыя салідарнасці з Беларуссю. Тэксты беларускіх пісьменнікаў і паэтаў чыталі на шведскай і ангельскай мовах вядомыя палітыкі, пісьменнікі і журналісты Швецыі, сябры беларускай суполкі “Sveriges Belarusier”.
Адкрыў чытанні старшыня шведскага ПЭН цэнтру Ула Лашмо (Ola Larsmo). Потым выступіла міністар культуры Швецыі Лена Адэльсон Лільероц (Lena Adelsohn Liljeroth) і сакратар сацыал-дэмакратычнай партыі, сябра парламэнта Швецыі Карын Йэмцін (Carin Jämtin). Прагучалі творы шэрагу беларускіх аўтараў.
Правабаронца Марцін Угла прачытаў тэкст з кнігі Алеся Бяляцкага.
Адначасова сябры суполкі “Sveriges Belarusier” падпісалі паштоўкі палітычным вязням Беларусі, а праваабаронцы з Östgruppen правялі пікет за вызваленьне старшыні праваабарончага цэнтру “Вясна” Алеся Бяляцкага.
“Для шведаў, думаю, гэта праява салідарнасьці, сімвалічны вітальны рух у бок дэмакратычнай Беларусі, напамін пра тое, што несвабода існуе побач, і знак неабыякавасці, для беларусаў, спадзяюся, - прыкладна тое самае”, - падзяліўся сваімі меркаваньнямі пра акцыю літаратар і перакладчык Дзмітрый Плакс.
