Дэпутаты парламенцкай групы “Рэспубліка” пачалі збор подпісаў за датэрміновае вызваленьне вядомага навукоўца Юрыя Бандажэўскага.

Як паведаміла Радыё Свабода, паводле кіраўніка групы Сяргея Скрабца, плянуецца сабраць да 20 подпісаў дэпутатаў, у тым ліку ня толькі сяброў групы “Рэспубліка”. Ліст будзе накіраваны на імя кіраўніка дзяржавы Аляксандра Лукашэнкі.

Нагадаем, былы рэктар Гомельскага мэдычнага інстытуту Юры Бандажэўскі быў асуджаны на 8 гадоў за хабарніцтва. Між тым, праваабронцы лічаць, што ягоная віна ў судзе не была даказаная, і зьвязваюць асуджэньне Бандажэўскага зь ягонай дзейнасьцю вывучэньня наступстваў Чарнобыльскай аварыі для здароўя людзей. У турме Юры Бандажэўскі знаходзіцца ўжо больш за 2 гады.