Гародня. Рэкламную прадукцыю Радыё Рацыя пакуль не вяртаюць
Рэкламную прадукцыю Радыё Рацыя пакуль не аддаюць, хаця сама міліцыя і была ініцыятарам яе вяртання. Нагадаем, прадукцыя Беларускага Радыё Рацыя была забрана з аўтамабіля гарадзенскага праваабаронцы Віктара Сазонава 26-га лістапада. Тады праваабаронцу паведамілі, што на працягу дзесяці дзён ён даведаецца пра тое, што будзе з гэтай прадукцыяй: ці яе вернуць, ці знішчаць. І сапраўды, праз дзесяць дзён, 6 лістапада Віктар Сазонаў па тэлефоне атрымаў інфармацыю з міліцыі, што можа забраць сканфіскаваныя рэчы. Але калі праваабаронца прыехаў за імі ў Ленінскі РАУС Гародні, яму сказалі, што прадукцыя патрабуе яшчэ дадатковай экспертызы.
Што новага могуць убачыць эксперты ў каляндарыках на наступны год з лагатыпамі “Радыё Рацыя” і хвалямі вяшчання 98,1 ў Гародні і 99,2 ў Берасці, ці ў кашульках з надпісам Радыё Рацыя -- застаецца загадкай.
