Барысаў: Пікет у Дзень правоў чалавека забаронены

У Барысаве праваабаронцы Алег Мацкевіч і Марына Статкевіч 5 снежня атрымалі ад райвыканкама адмову ў правядзенні пікету, прымеркаванага да 63-яй гадавіны прыняцця Усеагульнай дэкларацыі правоў чалавека ААН. Прычына адмовы чыноўнікаў – фармальная адпіска.

У адказе за подпісам старшыні райвыканкама У.У. Мірановіча праваабаронцам паведамляецца, што яны парушылі заканадаўства пра масавыя мерапрыемствы і адпаведнае рашэнне Барысаўскага райвыканкама, паколькі адначасова з заявай на пікет не прадаставілі дамовы на ахову грамадскага парадку, медыцынскае абслугоўванне падчас мерапрыемтсва і ўборку тэрыторыі пасля яго.

Трэба адзначыць, што ў сваёй заяве Алег Мацкевіч і Марына Статкевіч узялі на сябе абязальніцтва забяспечыць грамадскі парадак падчас мерапрыемства, а ў выпадку неабходнасці прыняць меры, звязаныя з медыцынскім абслугоўваннем і прыборкай тэрыторыі.

Раённы начальнік нагадаў заяўнікам пікету, што яны маюць права абскардзіць яго рашэнне ў судовым парадку.