Анатоль Лябедзька арыштаваны на 10 сутак

Паводле Радыё "Свабода", такое рашэньне прыняў сёньня судзьдзя Аляксей Бычко з суду Цэнтральнага раёну Менску. Анатоля Лябедзьку прызналі вінаватым ў тым, што 16 ліпеня ён "нецэнзурна лаяўся на міліцыянтаў і не выконваў іхных законных патрабаваньняў". Як паведаміла Хартыя'97, сьведкамі ў працэсе выступалі супрацоўнікі АМАПу, якія праводзілі затрыманьне, - Васіль Гарасюк, Юры Янковіч. Сьведкам ад імя ўдзельніка акцыі выступаў Ігар Панфілаў.
Нагадаем, палітык быў затрыманы напярэдадні пікету побач з амбасадай Расеі ў Беларусі. Вінаватым сябе ў дробным хуліганстве Анатоль Лябедзька не прызнаў, хаця і не адмаўляў, што зьбіраўся ўдзельнічаць ў пікеце салідарнасьці з палітычнымі вязьнямі Беларусі.