Заява Абсерваторыі адносна затрымання праваабаронцы Андрэя Палуды

Абсерваторыя па абароне правоў праваабаронцаў распаўсюдзіла тэрміновую заяву адносна затрымання 22 лістапада беларускімі памежнымі службамі праваабаронцы Андрэя Палуды, падчас якога былі канфіскаваны дзесяць асобнікаў сумеснага выдання ПЦ “Вясна” і БХК “Прэзідэнцкія выбары 2010: Вынікі незалежнага назірання”.

Абсерваторыя асуджае канфіскацыю як “яшчэ адно парушэнне свабоды выказвання думак і пагрозу пераследу любога незалежнага меркавання ў кантэксце гвалтоўных рэпрэсіяў у Беларусі”.

У сваім Звароце, адрасаваным беларускім уладам, Абсерваторыя заклікае “забяспечыць фізічную і псіхічную недатыкальнасць сп. Андрэя Палуды”, а таксама “спыніць усе віды пераследу – у тым ліку на судовым узроўні – супраць усіх беларускіх праваабаронцаў”.