У Бабруйску міліцыя папярэджвае мясцовых актывістаў
Учора вечарам, 31 кастрычніка, участковы міліцыянер наведаў лідэра бабруйскіх сацыял-дэмакратаў Юрыя Грынявецкага.
Супрацоўнік міліцыі спрабаваў засцерагчы бабруйскага палітыка ад ўдзелу ў несанкцыяваных масавых мерапрыемтсвах, распаўсюду друкаванай прадукцыі без выходных дадзеных і іншых правапарушэнняў і злачынстваў, артыкулы па якіх найчасцей ужываюцца ў краіне датычна грамадскіх і палітычных актывістаў.
“Міліцыянер хацеў, каб я пісьмова пацвердзіў, што папярэджаны аб гэтым, - гаворыць Юрый Грынявецкі, - аднак падпісваць паперку, якую ён спрабаваў мне ўсунуць, я адмовіўся, бо я яшчэ нічога незаконнага не здзейсніў, а мяне ўжо папярэджваюць аб адказнасці”.
Нагадаем, што 27 кастрычніка міліцыянеры завіталі дадому да іншага актывіста Беларускай сацыял-дэмакратычнай партыі Станіслава Кавалеўскага. Яго таксама хацелі афіцыйна папярэдзіць аб недапушчальнасці парушэння артыкулаў Адміністрацыйнага і Крымінальнага кодэксаў. Падпісваць папярэджанне Станіслаў Кавалеўскі таксама адмовіўся.
