Пракуратура дапытала магілёўскую журналістку Аліну Скрэбунову
Сёння Магілёўская пракуратура дапытала журналістку Аліну Скрэбунову з нагоды каментароў, пакінутых на сайце “Хартыя-97”.
Допыт вёў старэйшы следчы пракуратуры Магілёўскай вобласці па г.Магілёву Павел Старыкаў.
“Следчы пытаўся ў мяне, ці ведаю я сайт “Хартыя-97” і ці наведваю я яго, а таксама, што я ведаю пра каментар, пакінуты невядомым адносна суддзі Ланчавай 7 ліпеня ў 16-00. Я адказала, што ў гэты дзень я адсіджвала суткі ў ізалятары часова ўтрымання, бо была затрымана падчас адной з “маўклівых акцый” пратэсту і зрабіць гэты каментар не магла”, - гаворыць Аліна Скрэбунова.
Праваабраронца Барыс Бухель адзначае, што Аліну дапытвалі з нагоды абразлівага каментару суддзі Ланчавай і хацелі ўстанавіць, хто гэты каментар мог зрабіць.
“Нейкі аддзел па высокіх тэхналогіях пры УУС Магаблвыканкама адсочвае інтэрнэт-прастору і звярнуўся з ініцыятывай у пракуратуру, каб высветліць, хто мог зрабіць гэты каментар, каб прыцягнуць крыўдзіцеля за абразу, бо гэта ёсць абраза дзяржаўнага службоўцы. Як паведаміў пракурор, сама суддзя Ланчава да іх з заявай з нагоды абразы не звярталася”, - гаворыць Барыс Бухель.
