Школьнікі Полацка абавязаны правесці заўтрашнюю суботу ў школе
Полацкі аддзел адукацыі «рэкамендаваў» школам горада зрабіць заўтрашні суботні дзень «падоўжаным» для школьнікаў. Фактычна, дзеці абавязаны будуць правесці ў школе час з раніцы і да двух гадзін дня.
У звычайным варыянце па некалькі ўрокаў і факультатываў у суботу ёсць толькі ў 10-11 класаў, але да дванаццаці-гадзіны дня старшакласнікі вольныя. Дзеці малодшага і сярэдняга звяна прыходзяць у школу ў суботу для заняткаў у гуртках і секцыях або на спецыяльна арганізаваныя мерапрыемствы, якія звычайна не займаюць больш за дзве гадзіны.
Старшакласнікам некалькіх школ класныя кіраўнікі і адміністрацыя заявілі, што яны абавязаны адсядзець ў школе пэўны час для сваёй жа карысці, каб выпадкова не апынуцца «не на тым месцы не ў той час», гэта значыць на галоўнай гарадской плошчы падчас запланаванага Народнага сходу.
