Целяпуна папярэдзілі па прадстаўленні Генпракуратуры (абноўлена)
Мазырскі праваабаронца Уладзімір Целяпун
Мазырская раённая пракуратура па прадстаўленні Генпракуратуры папярэдзіла праваабаронцу Уладзіміра Целяпуна аб адказнасці за … арганізацыю і ўдзел у Народным сходзе. На пярэчанне праваабаронцы што ён не датычны да арганізацыі сходу, а ўсяго толькі прасіў дазволу на пікет, у пракуратуры адказалі: “Гэта не мае значэння, лепей сядзіце дома”.
Уладзіміра Целяпуна сёння з раніцы не пакідалі у спакоі прадстаўнікі мясцовай улады. Спачатку да яго завітала дэлегацыя райвыканкама на чале з галоўным ідэолагам Мазыршчыны Тацянай Ганчарэнка, якія азнаёмілі праваабаронцу з рашэннем аб адмове ў правядзеньні пікету 8 кастрычніка.
Затым праваабаронца накіраваўся ў Мазырскую пракуратуру, куды яго выклікалі позвай. У той жа час Целяпуна адначасова расшукваюць і супрацоўнікі міліцыі.
Нагадаем, што раней Уладзімір Целяпун атрымаў станоўчы адказ з райвыканкама на правядзеньне 8 кастрычніка пікету на стадыёне “Спартак”.
Апошнім часам праваабаронца чатыры разы безвынікова звяртаўся у райвыканкам па дазвол на пікет, пакуль не зьвярнуўся пісьмова да старшыні аблвыканкаму наконт парушэньня свайго канстытуцыйнага права на свабоду мірных сходаў. Аднак і гэтым разам улады робяць усё магчымае і немагчымае, каб не дазволіць грамадзянам публічна выказваць сваё меркаванне.
