Віцебскі ўдзельнік акцыі маўклівага пратэсту дамогся адмены штрафу
Аляксандр Бажкоў
Праз тры месяцы пасля затрымання і пакарання адбыўся паўторны працэс у Кастрычніцкім райсудзе Віцебску, дзе Аляксандра Бажкова прызналі невінаватым. Гэта адзіны выпадак, калі пратэстоўцу ўдалося абскардзіць рашэнне райсуду ў Віцебскім абласным судзе, бо скаргі астатніх былі адхіленыя.
Справу Аляксандра Бажкова, затрыманага 6 ліпеня падчас руху з плошчы Перамогі пад воплескі, разбіраў суддзя Кастрычніцкага райсуду Эрнэст Марцірасян. Ён прызнаў хлопца невінаватым і скасаваў адміністратыўную справу ў адрозненне ад сваёй калегі Іны Грабоўскай, якая 7 ліпеня прысудзіла штрафы 15-ці жыхарам Віцебску за ўдзел у несанкцыянаванай акцыі.
Пастанову Іны Грабоўскай спадар Бажкоў абскардзіў у абласным судзе.
“Судздзя Ірына Смалякова адхіліла тры скаргі, пададзеныя ў абласны суд. Такім чынам, штрафы , прысуджаныя Усеваладу Жураўлёву, Уладзіміру Мацьвееву і Улляне Хлашчанковай, засталіся неаспрэчаныя. Астатнія затрыманыя 6 ліпеня вырашылі ў абласны суд не звяртацца, бо штрафы падаліся ім неістотнымі ў грашовым вымярэнні - усіх дзяўчат Іна Грабоўская аштрафавала на адну базавую велічыню, а ўсіх хлопцаў – на дзве. Дамагчыся паўторнага перагляду ўдалося толькі Аляксандру Бажкову”, - гаворыць юрыст Аляксей Гаўруцікаў, які дапамагаў хлопцу складаць скаргу.
Падчас акцыяў маўклівага пратэсту і непасрэдна пасля іх у Віцебску былі затрыманыя некалькі дзесяткаў чалавек. Некаторых адпускалі без складання пратаколаў, а некаторым прысуджалі штрафы, часам досыць вялікія. Да прыкладу, віцебскую каардынатарку аргкамітэту па стварэнні партыі БХД Таццяну Севярынец у Кастрычніцкім райсудзе аштрафавалі на 20 базавых велічынь (700 тысяч рублёў).
