У Брэсце забароненыя пікеты ў падтрымку палітзняволеных

Брэсцкі прадпрымальнік Віктар Чайкоўскі, які з’яўляецца намеснікам старшыні РАА “Перспектыва”, атрымаў адказ з мясцовага гарвыканкаму наконт правядзення шэрагу пікетаў з патрабаваннем свабоды для палітычных зняволеных, спынення катаванняў і пераследу актывістаў па палітычных матывах.

Пікеты планавалася праводзіць у вечаровы час з 1 па 5 кастрычніка ў найбольш ажыўленых месцах горада, сярод якіх – плошча Леніна, праспект Машэрава, бульвар Касманаўтаў, вуліца Пушкінская.

У адказе Брэсцкага гарвыканкаму заборона гэтых акцый тлумачыцца тым, што пікеты мусілі прайсці на пляцоўках, які не прадуглеждваюць правядзенне такіх мерапрыемстваў. Акрамя таго, да заяўкі на пікеты не былі прыкладзеныя дамовы з органамі унутраных спраў, установамі аховы здароўя (“хуткая дапамога”) і камунальным прадпрыемствам, што адказвае за вываз смецця.

Як паведаміў Віктар Чайкоўскі, дзве пляцоўкі, якія брэсцкія ўлады вызначылі для правядзення пікетаў, для гэтых мэтаў не прыдатныя: стадыён “Лакаматыў” месціцца ў прыватным жылым сектары і агароджаны вялікім заборам, а пляцоўка ў парку воінаў-інтэрнацыяналістаў фактычна знаходзіцца ў лясным масіве. Таму, па словах Чайкоўскага, ён і іншыя ініцыятары пікетаў будуць дамагацца правядзення акцый, каб жыхары Брэста ведалі пра існаванне ў Беларусі палітзняволенных, супраць якіх ужываюцца катаванні.