Пракурорская парука: ніхто не бярэ адказнасць за дазвол праслухоўваць тэлефоны
Маладафронтавец Юльян Місюкевіч тры месяцы спрабуе высветліць, хто дазволіў праслухоўваць яго тэлефон. Пакуль безвынікова.
21-гадовы студэнт БДУ праходзіў у якасці сведкі па справе аб так званых масавых беспарадках 19 снежня 2010 года. І падчас чарговага допыту ў сакавіку яму далі праслухаць запісы яго тэлефонных размоў за лістапад-снежань мінулага года. Па словах Місюкевіча, большасць тых размоў адбылася да падзей на Плошчы. І яму незразумела, у рамках якой крымінальнай справы органы маглі яго «слухаць».
Юльян накіраваў зварот у Генеральную пракуратуру, дзе папрасіў паведаміць, калі і які пракурор даў дазвол на праслухоўванне. З Генпракуратуры зварот накіравалі ў пракуратуру Віцебскай вобласці (дапытваў Місюкевіча следчы з УКДБ па Віцебскай вобласці Бычак, які ў Мінску знаходзіўся ў камандзіроўцы). Там адказалі, што Бычак працаваў у складзе аператыўнай групы, якая займалася расследаваннем крымінальнай справы па «масавых беспарадках». І, маўляў, нагляд за законнасцю расследавання мае праводзіць пракуратура Мінска. Сталічная ж пракуратура адправіла зварот... ізноў у Генпракуратуру. Адкуль пачынаў маладафронтавец, туды і вярнуўся. А на мінулым тыдні прыйшоў чарговы адказ з Генпракуратуры. З яго вынікае, што зварот маладафронтаўца накіраваны ў КДБ «для разгляду па сутнасці».
Юльян Місюкевіч абураны фактам праслухоўвання. «Раз ужо мае размовы слухаў КДБ,я хачу ведаць, якую небяспеку ўяўляю для краіны. Калі ж гэта былі незаконныя дзеянні, хай пракуратура разбярэцца з гэтым фактам»,— кажа ён.
