Справаздача Фронтлайн: выбары ў Беларусі суправаджаліся рэпрэсіямі
У “Другой Штогадовай Справаздачы Фронтлайн па становішчы праваабаронцаў” адзначаецца пагаршэньне сытуацыі падчас выбараў у Беларусі 2010 года. У дакуманце адзначаецца, што выбары ў Беларусі «суправаджаліся суровымі рэпрэсіямі ў дачыненьні да грамадзянскай супольнасьці».
"Канец году ў Беларусі адзначыўся цяжкімі рэпрэсіямі супраць грамадзянскай супольнасьці пасьля прэзыдэнцкіх выбараў 19 снежня у выніку вулічных пратэстаў супраць абвешчаных вынікаў. Практычна ва ўсіх офісах праваабарончых арганізацыях адбыліся ператрусы, было канфіскаванае абсталяваньне, сябры арганізацый былі арыштаваныя і затрыманыя. Дзяржаўныя сродкі масавай інфармацыі пачалі кампанію па абвінавачаньні праваабарончых арганізацый ў падпарадкаванасьці апазіцыйным палітычным партыям і прасоўваньні заходніх інтарэсаў. Журналісты-праваабаронцы таксама сутыкнуліся з перасьледам і абмежаваньнямі ў працы,а два чалавекі былі затрыманыя ў межах крымінальнай справы па факце масавых беспарадкаў ", сьцьвярджаецца ў справаздачы.
Даклад разглядае глябальныя тэндэнцыі і зьмены ў стане праваабаронцаў у 2010 годзе і аналізуе сытуацыю ва ўсіх рэгіёнах сьвету.
У справаздачы гаворыцца, што, нягледзячы на некаторыя пазытыўныя зьмены і хвалю грамадзянскіх пратэстаў на Блізкім Усходзе і ў Паўночнай Афрыцы ў канцы года, 2010 год у цэлым ня быў спрыяльным для праваабаронцаў, якія па-ранейшаму сутыкаюцца з прыгнётам і рэпрэсіямі ў многіх краінах.
Справаздача заснавана на працы Фронтлайн па абароне праваабаронцаў, якія знаходзяцца ў зоне рызыкі. У 2010 годзе арганізацыя апублікавала 253 надзвычайных паведамленьні па становішчы 369 праваабаронцаў у 65 краінах свету, а гэтак жа падала 180 грантаў на забесьпячэньне бясьпекі і правяла адукацыйныя праграмы для больш чым 500 праваабарончых актывістаў. Такім чынам, больш за 1100 праваабаронцаў атрымалі падтрымку Фронтлайну ў 2010 годзе.
