У Магілёве адмоўлена ў рэгістрацыі грамадскаму аб’яднанню
Ігар Барысаў
Галоўнае ўпраўлення юстыцыі Магілёўскага аблвыканкама адмовіла ў рэгістрацыі грамадскаму аб’яднанню “Магілёўскі цэнтр стратэгічнага развіцця “Імпульс”.
Дырэктарка “Цэнтра прававой трансфармацыі” Вольга Смалянка адзначае, што aрганізацыі было адмоўлена ў рэгістрацыі на падставе неадпаведнасці ўстаноўчых дакументаў заканадаўству.
“Да ўстаноўчага дакумента, якім для грамадскага аб’яднання з’яўляецца Статут, у галоўнага ўпраўлення юстыцыі дзве прэтэнзіі – наяўнасць палажэння аб фарміраванні грашовых сродкаў з прыбыткаў ад прадпрымальніцкай дзейнасці, якая здзяйсняецца ў адпаведнасці с заканадаўствам. Другая прэтэнзія заснавана на здагадцы супрацоўнікаў Магілёўскага аблвыканкама аб магчымым размеркаванні грашовых сродкаў паміж сябрамі грамадскага аб’яднання пасля рэгістрацыі”, - гаворыць Вольга Смалянка.
“Ні першая, ні другая прэтэнзія не можа быць пакладзена ў аснову рашэння аб адмове ў рэгістрацыі грамадскага аб’яднання. Палажэнне аб прадпрымальніцкай дзейнасці выкладзена ў Статуце ў адпаведнасці з арт.21 Закона Рэспублікі Беларусь “Аб грамадскіх аб’яднаннях”, тым больш паўтарае яе. Таксама адмова ў рэгістрацыі аб’яднання не можа грунтавацца на здагадках”, - адзначае дырэктарка “Цэнтра прававой інфармацыі”.
Старшыня “Магілёўскага цэнтра стратэгічнага развіцця” Ігар Барысаў (на фота) таксама адзначае, што моманты, якія адлюстравала ў сваім пісьмовым адказе магілёўская юстыцыя, не з’яўляюцца нагодай для нерэгістрацыі новаўтворанага аб’яднання.
“Гэта не прынцыповыя моманты і іх можна было б выправіць падчас працэсу рэгістрацыі, - гаворыць Ігар, - дастаткова было чыноўнікам, якія займаюцца рэгістрацыяй аб’яднання, патэлефанаваць мне і паведаміць, што трэба падкарэктаваць адну фразу ў Статуце, хіба гэта так складана?”
“Нерэгістрацыя арганізацыі з’яўляецца індыкатарам таго, што ў нас у грамадстве праблемы не толькі з курсам даляра, але і з дэмакратыяй уцэлым. Чыноўнікі не зацікаўлены ў развіцці грамадскага сектара, і ў гэтым пытанні праяўляюць кансерватыўнасць і безыніцыятыўнасць, не ідуць на сустрач”, - адзначае кіраўнік новаўтворанай арганізацыі.
Ігар Барысаў кажа, што ў бліжэйшы час будуць выпраўлены выяўленыя недакладнасці ў Статуце.
“Натуральна, што пасля выпраўленных памылак мы зноўку пададзім пакет дакументаў на рэгістрацыю аб’яднання. Пра тое, якія скаргі пісаць на чыноўнікаў і ці падаваць заяву ў суд, мы вырашым у бліжэйшы час”, - гаворыць Ігар.
“Праваабарончая хроніка”
