Марцін Угла: эканамічныя санкцыі як адзін з інструментаў
Лідар Шведскай ініцыятывы за дэмакратыю і правы чалавека Östgruppen Марцін Угла лічыць увядзенне эканамічных санкцый супраць Беларусі адным з інструментаў у патрабаванні вызвалення палітвязняў.
- Трэба карыстацца ўсімі магчымымі інструментамі, эканамічныя санкцыі адзін з іх. Гаворка ідзе аб кропкавых эканамічных санкцыях і гэта добрая ідэя. Але трэба каб крэтэрыі гэтых санкцый былі дакладна акрэсленыя. Першы прыярытэт, гэта каб усе палітвязні былі вызваленыя, але і пасля гэтага трэба будзе працягваць ціск на ўлады Беларусі, каб сістэмна змяніць сітуацыю.
На думку Марціна Угла, вызваленне палітвязняў будзе не канцом пытання ў Беларусі, а пачаткам працэсаў сістэмных зменаў у краіне.
“19 траўня Шведская ініцыятыва за дэмакратыю і правы чалавека Östgruppen арганізуе ў цэнтральным Стакгольме мітынг за вызваленне палітвязняў у Беларусі,” – кажа кіраўнік ініцыятывы за дэмакратыю Марцін Угла:
- Мітынг мы арганізоўваем разам з іншымі праваабарончымі і палітычнымі арганізацыямі. Аднім з галоўных мэсыджаў акцыі з'яўляецца патрабаванне аб вызваленні ўсіх палітвязняў у Беларусі. Зараз сітуацыя выглядае крытычнай, сітуацыя для грамадскай супольнасці вельмі сур’ёзная, але ўсё ж такі ёсць надзея на хуткія змены ў Беларусі.
Шведская ініцыятыва за дэмакратыю і правы чалавека Östgruppen даўно падтрымлівае праваабарончы рух у Беларусі і ўплывае на палітыку Швецыі і Еўразвяза датычна Беларусі, а таксама ўздымае інтарэс да нашай краіны і распаўсюджвае інфармацыю аб тым, што ў нас адбываецца.
