Не аплаціў паслуг дзяржустаноў – не можаш пікетаваць супраць збяднення

Бярозаўскія грамадскія актывісткі Галіна Кавалевіч і Таццяна Аліхвер атрымалі адмову на заяву аб правядзенні пікета з Бярозаўскага райвыканкама за подпісам намесніка старшыні Яўгена Тарасюка.

Па словах Галіны Кавалевіч, прычыны для адмовы – абсалютна надуманыя. Па-першае,  як напісана ў адмове, рашэннем райвыканкама выдзелены пэўныя месцы для масавых мерапрыемстваў - гэта стадыёны. Па-другое, разам з заявай на пікет Кавалевіч і Аліхвер павінны былі даслаць копіі дамоў з  міліцыяй, хуткай дапамогай, жыллёва-камунальнай гаспадаркай і пажарнай.

Але, на думку заяўніц пікету, звычайна на стадыёнах толькі козы пасуцца. Ім пікеты не патрэбны. Наконт дамоў са службамі -- таксама пытанне, калі не маеш дазволу. Зноў жа, пікет скіраваны супраць збяднення, адкуль у заяўніц пенсійнага ўзросту сродкі, каб заплаціць службам, якія нібыта будуць абслугоўваць пікет, ды і масавасць пікета невялікая: усяго 10 чалавек. А сума можа быць тут немалая: не так даўго "свабода выказвання меркаванняў" у Гомелі была ацэнена больш як міл'ёнам рублёў.

Актывісткі маюць намер звярнуцца ў суд, каб абскардзіць адмову раённых уладаў у правядзенні пікета, падчас якога яны збіраліся нагадаць жыхарам горада аб палітвязнях ды пратэставаць супраць збяднення насельніцтва.

Пікет быў запланаваны каля ўвахода на вялікі рынак Бярозы.

“Праваабарончая хроніка”