Дзень Волі для Барыса Хамайды адзначаны чарговым мільённым штрафам

Барыс Хамайда вырашыў адзначыць Дзень Волі напісаннем дыктоўкі  каля так званага сіняга дому – дому №28 а вуліцы Леніна, дзе ён распаўсюджвае незалежную прэсу. Да яго далучылася Антаніна Піванос, украінка па нацыянальнасці, якая на знак саліданасці з беларускім апазыцыянэрам  пісала дыктоўку на сваёй роднай мове, перакладаючы “Ліст з-пад шыбеніцы” Кастуся Каліноўскага на ўкраінскую.

Завяршаць дыктоўку давялося ўжо ў пастарунку, куды Барыса Хамайду завезлі пад вартай, а спадарыня Піванос прыйшла па ўласнай волі. З Чыгуначнага РАУС апазіцыянера завезлі ў суд.

Суддзя Чыгуначнага райсуду Уладзіслаў Шыкароў не толькі аштрафаваў спадара Хамайду на 30 базавых велічынь, але і пастанавіў, каб у актывіста быў сканфіскаваны бел-чырвона-белы сцяг і ўсе прылады для яго мацавання.

З 2 сакавіка гэта ўжо чацверты штраф, накладзены суддзёй Уладзіславам Шыкаровым на Барыса Хамайду за бел-чырвона-белыя  сцягі. Апазіцыянера караюць за тое, што ён перыядычна выходзіць у цэнтар Віцебску з нацыянальным сімвалам, праводзячы аднаасобную акцыю “2011 год – год нацыянальнага сцяга”, прымеркаваную да 20-годдзя абвяшчэння незалежнасці Беларусі. 

“Праваабарончая хроніка”