У Астраўцы затрымалі журналіста
Сёньня ў Астраўцы быў
затрыманы і дастаўлены ў мясцовае аддзяленне міліцыі карэспандэнт
інтэрнэт-газеты «Салідарнасць» Сяргей Балай. Журналіст прыехаў у
камандзіроўку па рэдакцыйным заданьні: каб апытаць мясцовых
жыхароў, як яны ставяцца да будаўніцтва Астравецкай АЭС, улічваючы апошнія
падзеі ў Японіі.
- Да мяне падышлі супрацоўнікі
крымінальнага вышуку для праверкі дакументаў, калі я ўжо скончыў збіраць
інфармацыю для рэпартажу, - распавёў Сяргей у тры гадзіны дня, знаходзячыся ў
міліцыі. - Потым я адправіўся на вакзал,
каб вяртацца ў Мінск, але прадстаўнікі праваахоўных органаў вярнуліся. Яны даставілі мяне ў мясцовы
аддзел унутраных спраў. Зараз перапісваюць пашпартныя
дадзеныя, пытаюцца, што я тут раблю. Сказалі, што тэлефанавалі
мясцовыя жыхары, паведамілі, што па пасёлку ходзіць журналіст і пра нешта распытвае. У сувязі з гэтым яны нібыта і
павінны былі адрэагаваць.
Праз 15 хвілін Сяргей Балай
ператэлефанаваў, сказаўшы, што тлумачэнні з яго узятыя, і зараз супрацоўнікі
міліцыі на аўтамабілі вязуць яго на вакзал.
