У дзень Святога Валянціна Алесь Бяляцкі даведаўся пра спатканне з Генеральнай пракуратурай

14 лютага пасля абеду старшыні праваабарончага цэнтру “Вясна” Алесю Бяляцкаму затэлефанаваў чалавек, які прадставіўся намеснікам начальніка аддзела па нагляду за захаваннем правоў і свабодаў грамадзянаў Генаральнай пракуратуры РБ Паўлам Елісеевым.

Супрацоўнік Генпракуратуры выказаў жаданне пагутарыць з А. Бяляцкім. На пытанне, наконт чаго мяркуецца гутарка, сп. Елісееў адказаў: “Наконт дзейнасці праваабарончага цэнтра “Вясна”.

На думку Алеся Бяляцкага, гэты выклік звязаны з актыўнай дзейнасцю ПЦ “Вясна” як незарэгістраванай арганізацыі. Хутчэй за ўсё, мяркуе праваабаронца, ён будзе папярэджаны за дзейнасць ад імя незарэгістраванай арганізацыі.

“Калі гэтак адбудзецца, я адразу катэгарычна не згодны, -- пракаментаваў сітуацыю сам Алесь Бяляцкі. – Артыкул 193.1 – “Дзейнасць ад імя незарэгістраванай арганізацыі” – супярэчыць Канстытуцыі і міжнародным пагадненням Рэспублікі Беларусь, узятым ёю на сябе ў сферы абароны правоў чалавека. Гэта – рэпрэсіўны артыкул, накіраваны на ўдушэньне грамадзкай актыўнасьці ў Беларусі”.   

Гутарка А.Бяляцкага ў Генпракуратуры адбудзецца 16 лютага, у сераду, у 15 гадзінаў.  Да серады павінна быць даслана афіцыйная позва.