ЦВК адмовіўся хадайнічаць аб вызваленні кандыдатаў у прэзідэнты
На сённяшнім паседжанні Цэнтральнай выбарчай камісіі давераная асоба кандыдата ў прэзідэнты Андрэя Саннікава і сябра ЦВК з правам дарадчага голасу Юрый Хадыка звярнуўся да камісіі з патрабаваннем выступіць з хадайніцтвам да праваахоўных органаў. На думку Хадыкі, ЦВК мусіць запатрабаваць вызвалення ўсіх затрыманых кандыдатаў у прэзідэнты.
Хадыка матываваў гэта тым, што кандыдаты не заклікалі нікога біць вокны і дзверы ў будынку Дома ўраду і самі гэта не рабілі. "Таму затрыманне незаконнае", — сказаў Юрый Хадыка. Яго падтрымаў сябра ЦВК з правам дарадчага голасу Канстанцін Лукашоў.
Аднак старшыня камісіі Лідзія Ярмошына заявіла, што "з папулісцкай кропкі гледжання такая заява і выглядала б эфектна", але яны яе не падтрымліваюць. З іншага боку, гэтае пытанне "не ў кампетэнцыі" ЦВК. Таму зварот Хадыкі быў адхілены праз галасаванне.
