Скаргі праваабаронцы былі разгледжаны пасля выбараў
Прадстаўнік БХК у Салігорску Леанід Мархотка
Раніцай 19 снежня доўгатэрміновым назіральнікам Леанідам Мархоткам былі пададзены тры скаргі аб грубых парушэннях выбарчага працэсу ў Салігорскую камісію па выбарах. Разгледжаны яны былі толькі ў 22:30 - праз дзве с паловай гадзіны пасля заканчэння галасавання, што з'яўляецца грубейшым парушэннем выбарчага працэсу.
- Скаргі пададзеныя ў асноўны дзень галасавання мусяць быць разгледжаны ў гэты ж дзень, каб была магчымасць выправіць сітуацыю да пачатку падліку галасоў. Як бачым, тэрытарыяльная камісія пайшла на грубейшае парушэнне і, па сутнасці, магла даць толькі нічога ўжо ня вырашаючую адпіску. Так і адбылося, - кажа праваабаронца Беларускага Хельсінскага Камітэту. - Уласна, нават гэты пратэрмінаваны разгляд адбыўся толькі таму, што я ўзняў гэтае пытанне пад час працы Салігорскай тэрытарыяльнай камісіі ў прысутнасці міжнародных назіральнікаў з місіі БДІПЧ АБСЕ.
Аналагічныя скаргі былі накіраваны ў Салігорскую раённую пракуратуру, разгледжанне якіх таксама мусіла быць праведзена ў гэты ж дзень. Аднак абсалютна ніякіх паведамленняў з пракуратуры па выніках разгляду гэтых заяваў 19 снежня доўгатэрміновы назіральнік Л.Марахотка так і не атрымаў.
“Праваабаронцы за свабодныя выбары”
