Маладэчна: Тры дні БРСМ агітаваў за “здаровую” і “моцную і квітнеючую”

У Маладэчне на працягу трох дзён праходзіла акцыя-кірмаш “Здаровая Беларусь”, арганізатарам якой выступаў БРСМ. На кірмашы гандлявалі мёдам, на акцыі заклікалі зрабіць правільны выбар. Cумненняў у агітацыйнай скіраванасці мерапрыемства не ўзнікала: усе атрыбуты асацыяваліся з асобай кандыдата Лукашэнка.

Незвычайная форма мерапрыемства – спалучэнне выставы “Мир мёда” і разнастайных шоў – напэўна, была выбрана з разлікам на тое, што гэта прыцягне ўвагу розных узроставых груп, будзе цікавым і людзям старэйшага ўзросту, і моладзі.

Сапраўды, мерапрыемства наведвалі сем’ямі. Але, па назіраннях, большай папулярнасцю ў маладэчанцаў карыстаўся кірмаш, які размяшчаўся ў Палацы культуры. На мерапрыемствах масоўку складалі падлеткі – навучэнцы мясцовых навучальных устаноў пад кіраўніцтвам выкладчыкаў. Падчас канцэрта на Цэнтральнай плошчы яны па камандзе махалі сцягамі і сцяжкамі і апладзіравалі дыджэю, калі той нагадваў, што Беларусь мы любім за стабільнасць, за мірнае неба, за чыстыя вуліцы, і заклікаў зрабіць правільны выбар.

Хаця прозвішча Лукашэнка на мерапрыемстве не гучала, намёкі выбаршчыкам былі недвухсэнсоўныя. Нават пазлы, якія складалі на турніры, былі “ідэалагічна накіраваныя”.

“Праваабаронцы за свабодныя выбары”