Маладэчна: Адказ з выканкаму праваабаронцы чакалі 19 дзён

Праваабаронцы 19 дзён чакалі з Маладэчанскага райвыканкама адказ на сваю  заяву, якую напісалі яшчэ 29 кастрычніка. Паводле Выбарчага кодэксу, адказ павінны былі даць у трохдзённы тэрмін, то бок не пазней за 31 кастрычніка. Справа датычылася фарміравання Маладэчанскай раённай выбарчай камісіі.

Праваабаронцы Эдуард Баланчук, Аляксей Хвосцік і Алесь Капуцкі, зарэгістраваныя назіральнікамі ў раённай выбарчай камісіі, прасілі прадаставіць ім магчымасць азнаёміцца з дакументамі, у адпаведнасці з якімі гэтая камісія была сфарміравана. Старшыня райвыканкама Фёдар Дамаценка адказаў, што сярод правоў, пазначаных у артыкуле 13 Выбарчага кодэкса, няма права на атрыманне для азнаямлення матэрыялаў паседжанняў выканаўчых камітэтаў і Саветаў дэпутатаў. Падобныя адказы праваабаронцы атрымліваюць ужо не першы раз.

Па словах Эдуарда Баланчука, такі падыход не адпавядае прынцыпу адкрытасці і галоснасці падрыхтоўкі і правядзення выбараў, а падобная адмова выклікае падазрэнні, што дакументы проста не ў парадку.

“Праваабаронцы за свабодныя выбары”