На Брэстчыне абвешчаныя вынікі праверкі падпісных лістоў
Брэсцкая абласная камісія па выбарах Прэзідэнта Рэспублікі Беларусь апублікавала вынікі праверкі падпісных лістоў за вылучэнне кандыдатаў на гэтую пасаду.
Усяго на Брэстчыне збіралі подпісы і перадалі іх пасля ў тэрытарыяльныя раённыя камісіі ініцыятыўныя групы 10 вылучэнцаў (за выключэннем Уладзіміра Правльскага).
Найбольшая колькасць грамадзян у рэгіёне падтрымала вылучэнне Аляксандра Лукашэнкі (за яго падпісаліся 229837 чалавек), а праверку прайшлі амаль 55 тысяч подпісаў, пададзеных за гэтага прэтэндэнта, з якіх 111 прызнаныя несапраўднымі. У іншых вылучэнцаў колькасць забракаваных подпісаў выглядае наступным чынам: за Дзмітрыя Уса - 339, Уладзіміра Някляева - 337, Віталя Рымашэўскага - 333, Рыгора Кастусёва - 206, Мікалая Статкевіча - 165, Андрэя Саннікава - 152, Віталя Цярэшчанка - 100, Яраслава Раманчука - 72 , Алеся Міхалевіча - 55.
З паведамлення абласной камісіі вынікае, што акрамя звычайнай праверкі падпісных лістоў у некаторых прэтэндэнтаў подпісы правяраліся дадаткова. І хоць у асобных раёнах у чатырох вылучэнцаў - Статкевіча, Саннікава, Рымашэўскага і Уса - колькасць несапраўдных подпісаў перавышае 15% ад праверанага, у цэлым па Брэсцкай вобласці ўсімі прэтэндэнтамі неабходная норма выкананая.
"Праваабаронцы за свабодныя выбары"
