Маладэчна: афіцыйны курс на маўчанне

У маладэчанскіх СМІ па-ранейшаму не звяртаюць увагі на выбары. А выбарчыя плакаты ў горадзе размясцілі на ўстановах збольшага ў малазаўважных месцах. Складаецца ўражанне, што ўсё адмыслова робіцца дзеля таго, каб людзі не надавалі значэння гэтай важнай палітычнай падзеі.

Афіцыйная “Маладзечанская газета”, якая выходзіць два разы на тыдзень, упарта не заўважае выбарчую кампанію ў горадзе. Ні слова не было напісана ні пра збор подпісаў, ні пра пікеты, якія адбываліся штодзень. Можа таму, што пікеты ладзіліся па зборы подпісаў за дэмакратычных вылучэнцаў – Кастусёва, Саннікава, Раманчука і Някляева, а за Лукашэнку адбыўся толькі адзін, і зусім непаспяховы?

Пакуль што ў афіцыйных райвыканкамаўскіх выданнях – газеце і сайце – змяшчаюць толькі рашэнні ТВК. Маладэчанскі тэлевізійны канал пра прэзідэнцкія выбары таксама зусім не ўзгадвае.

Такім чынам, зараз шараговаму маладэчанцу можа падацца, што выбары датычацца выключна прадстаўнікоў апазіцыі.

“Праваабаронцы за свабодныя выбары”