Гродна: Праваабаронца дабіўся ўнясення зменаў у пастанову гарвыканкама

Гарадзенскі прадстаўнік БХК Раман Юргель сваімі скаргамі дабіўся ад мясцовых улад перагляду пастановы, датычнай вызначэння месцаў, забароненых для правядзення пікетаў па збору подпісаў за вылучэнцаў у кандыдаты на выбарах прэзідэнта. Грамадскі актывіст атрымаў два адказы на гэты конт – адзін з Цэнтральнай выбарчай камісіі, другі – з Гродзенскага абласнога выканаўчага камітэта. У адказе з аблвыканкама за подпісам намесніка старшыні Ігара Жука сцвярджаецца, што рашэнне Гродзенскага гарвыканкаму ад 21 верасня №460 адпавядала заканадаўству Рэспублікі Беларусь. Разам з тым, у першым абзацы адказу аблвыканкам афіцыйна праінфармаваў Рамана Юргеля пра рашэнне ад 13 кастрычніка №487, якое хоць і называецца “Аб унясенні зменаў і дапаўненняў у рашэнне Гродзенскага гарвыканкаму ад 21 верасня 2010 г. №460”, фактычна мяняе яго кардынальна. Адказ з ЦВК за подпісам Лідзіі Ярмошынай таксама інфармуе праваабаронцу пра  ўнясенне зменаў Гродзенскім гарвыканкамам у сваё рашэнне.

“Праваабаронцы за свабодныя выбары”