Брэст: Бібліятэкараў прымушаюць падпісвацца за Аляксандра Лукашэнку
У рэдакцыю газеты «Брестский курьер» патэлефанавала адна з супрацоўніц Цэнтральнай гарадской бібліятэкі Брэста і распавяла, што адміністрацыя ўстановы абавязала ўсіх супрацоўнікаў прынесці свае пашпарты і паставіць свае подпісы за вылучэнне кандыдатам у прэзідэнты Беларусі Аляксандра Лукашэнку.
Як стала вядома, аналагічныя ўказанні па тэлефоне паступілі і ў іншыя ўстановы, якія ўваходзяць у адзіную бібліятэчную сістэму горада. Пры гэтым бібліятэкараў папярэджваюць, што нежаданне ставіць подпіс за гэтага вылучэнца можа адгукнуцца "непрыемнасцямі" у будучым (у прыватнасці, непрацягненнем працоўнага кантракта). Супрацоўніца бібліятэкі, якая патэлефанавала ў рэдакцыю, задала пытанне: наколькі правамерна патрабаванне вышэйстаячага начальства падпісвацца за названага прэтэндэнта і ці можа адмова пацягнуць санкцыі з боку адміністрацыі? Пасля кансультацыі з праваабаронцамі журналісты «Брестского курьера» працытавалі аўтару тэлефоннага званка палажэнні Выбарчага кодэкса, дзе ўтрымліваўся адказ на цікавячае бібліятэкара пытанне.
"Праваабаронцы за свабодныя выбары"
