Нясвіжскія ўлады працуюць толькі з дзяржаўнай прэсай
Такую заяву зрабіў у размове з намеснікам галоўнага рэдактара газеты «Нясвіжскі час» Ігарам Еўтухам начальнік ідэалагічнага аддзелу Нясвіжскага райвыканкама Аляксандр Карнюшкін.
Ігар Еўтух тэлефанаваў ідэолагу, каб даведацца падрабязнасці візіту ў Нясвіж міністра культуры Літвы Арунаса Гелунаса. Аднак у інфармацыі карэспандэнту выдання было адмоўлена, паколькі ён прадстаўляе незалежную прэсу.
«У свой час былы старшыня райвыканкама Ігар Макар у адказе на ліст ГА „БАЖ“ падкрэсліваў, што як дзяржаўныя, так і недзяржаўныя выданні працуюць у адных умовах і маюць аднолькавы доступ да інфармацыі, — нагадаў галоўны рэдактар „НЧ“ Аляксей Белы. — Як бачым, гэта не так».
Рэдакцыя «НЧ» плануе ўзняць праблему ў часе найбліжэйшай «гарачай лініі» са старшынём абвыканкама.
