Супрацоўнікі райвыканкамаў займаюць вядучае месца ў выбарчых камісіях Брэстчыны
На кіруючых пасадах практычна ўсіх сфармаваных у Брэсцкай вобласці тэрытарыяльных камісій па выбарах прэзідэнта Рэспублікі Беларусь у абавязковым парадку прысутнічаюць супрацоўнікі мясцовых органаў выканаўчай улады. Такую выснову можна зрабіць пасля аналізу дадзеных аб складзе выбаркамаў, створаных у рэгіёне.
Як правіла, пасаду старшыні, намесніка старшыні альбо сакратара падобных тэрытарыяльных камісій займаюць штатныя ідэолагі або супрацоўнікі аддзела арганізацыйна-кадравай працы адпаведнага райвыканкама.
Найбольш красамоўная сітуацыя склалася ў Столінскім раёне, дзе тэрытарыяльную выбарчую камісію ўзначаліў першы намеснік старшыні райвыканкама Рыгор Пратасавіцкі, а сакратаром прызначана галоўны спецыяліст аддзела арганізацыйна-кадравай працы гэтага жа райвыканкама Таісія Багатка. У Маларыцкім выбаркаме ўсе кіруючыя пасады займаюць супрацоўнікі мясцовай раённай "вертыкалі" (начальнік аддзела арганізацыйна-кадравай працы, начальнік аддзела статыстыкі і сакратар старшыні райвыканкама). Падобная сітуацыя назіраецца і ў Камянцы, дзе выбарчую камісію ўзначалілі начальнік аддзела адукацыі, яго калега па аддзеле арганізацыйна-кадравай працы і галоўны спецыяліст аддзела ЖКГ райвыканкама.
"Праваабаронцы за свабодныя выбары"
