Баранавічы: Самыя шматлікія каманды ў Саннікава, Міхалевіча і Раманчука, трохі менш у Рымашэўскага, Някляева і Статкевіча

У Баранавічах завяршаецца фармаванне будучых ініцыятыўных групаў дэмакратычных кандыдатаў і відавочна, што выбарчая кампанія будзе праходзіць актыўна. Ужо дакладна вядома, што ў горадзе ёсць прадстаўнікі ініцыятыўных групаў шасці апазіцыйных лідэраў: Алеся Міхалевіча, Андрэя Саннікава, Яраслава Раманчука, Віталя Рымашэўскага, Уладзіміра Някляева і Мікалая Статкевіча. Пакуль няма ніякіх звестак пра колькасны склад ініцыятыўных групаў Аляксандра Лукашэнкі і Сяргея Гайдукевіча. Супрацоўнік ідэалагічнага аддзела Баранавіцкага гарвыканкама Сяргей Пузікаў паведаміў, што ён не валодае інфармацыяй пра стварэнне гэтых ініцыятыўных групаў.

Па звестках на сёння ў камандзе Андрэя Саннікава больш за 30 чалавек. Па словах актывіста Віктара Мезяка, 35% каманды складаюць не старыя партыйцы, а новыя людзі. У камандзе Міхалевіча – 37 чалавек. У яго камандзе найбольш вытрыманы “гендэрны баланс”: палова – дзяўчаты. У камандзе Яраслава Раманчука – 32 чалавекі, большую частку складае моладзь. Віталь Рымашэўскі мае 25 чалавек, а Уладзімір Някляеў – 22. У Рымашэўскага перавагу маюць беспартыйныя, а ў Някляева, наадварот, большасць складаюць баранавіцкія сацыял-дэмакраты. Мікалай Статкевіч мае таксама каля 20 актывістаў, большасць з якіх складаюць сябры “Народнай Грамады”.

Паводле прафесійнага складу ўсе гэтыя каманды вельмі разнастайныя. У іх уваходзяць прадстаўнікі бізнесу, творчай інтэлігенцыі, студэнты і працоўныя.

“Праваабаронцы за свабодныя выбары”