Бабруйск: Справа Таісіі Кабанчук накіравана ў міліцыю на ўдакладненне
Справа лідэра бабруйскай суполкі БХД Таісіі Кабанчук дасюль не вырашылася. Нагадаем, што суд над жанчынай, якая была затрыманая 25 сакавіка на чыгуначным вакзале, калі збіралася ехаць у Менск, пераносіўся ўжо два разы. Абвінавачваюць Таісію Кабанчук у аказанні супраціўлення супрацоўнікам міліцыі, якія яе затрымлівалі.
- Мне прыйшла “паперка” ад суддзі Наталлі Чарапухі, дзе паведамляецца, што матэрыялы па маёй справе накіраваны на ўдакладненне. Міліцыянты дапусцілі вельмі шмат памылак, калі складалі пратакол, нават імя маё запісалі няправільна – “Таісья”, з мяккім знакам. Думаю, што суддзя зацягвае справу, бо не хоча браць на сябе адказнасць. Хутчэй за ўсё суда не будзе, бо гэта дадатковы ўздым шуміхі, якая непатрэбная ўладзе, - мяркуе Таісія Кабанчук.
Таксама зацягваецца справа з разглядам скаргі Таісіі Кабанчук, якую яна падала ў бабруйскую пракуратуру на дзеянні супрацоўнікаў міліцыі. Скаргу перанакіравалі ў Магілёўскую пракуратуру, патлумачыўшы тым, што чыгуначнае аддзяленне міліцыі курыруе Магілёў.
