Суд над Таісіяй Кабанчук перанеслі з-за “няправільна складзенага пратакола”
Сёння мусіў адбыцца суд над лідэрам бабруйскай суполкі БХД Таісіяй Кабанчук. Нагадаем, што жанчына была затрыманая на чыгуначным вакзале 25 сакавіка супрацоўнікамі міліцыі, калі збіралася ехаць у Менск. Таісію Кабанчук пратрымалі ў аддзяленні міліцыі каля трох гадзінаў і планавалі асудзіць у гэты ж дзень. Але калі бабруйчанка запатрабавала адваката, суд прызначылі на сёння, 31 сакавіка.
- Справу разглядала суддзя Наталля Чарапуха, - распавядае Таісія Кабанчук. – Яна паведаміла, што міліцыянтамі быў няправільна складзены пратакол, таму суд давядзецца перанесці. На які час перанясуць, мне так і не змаглі паеведаміць. Да таго ж суддзя Чарапуха сказала, што, па ўсіму відаць, яна не будзе далей займацца маёй справай.
Бабруйская дэмакратычная актывістка, лідэр кампаніі “За свабоднае развіццё прадпрымальніцтва” Алена Мядзведева таксама прысутнічала на сёняшнім паседжанні.
– Наколькі я ведаю, калі пратакол няправільна складзены, суд не павінны адбыцца ўвогуле. У бабруйскіх прадпрымальнікаў балі падобныя выпадкі, і ім суды адмянялі. Таму я не разумею, якія могуць быць “пераносы”? – здзіўляецца Алена Мядзведзева.
