Гародня: Назіральніцу ад БХК аштрафавалі па месцы працы

Адміністрацыйная камісія Ленінскага раёну Гародні аштрафавала незалежную назіральніцу Святлану Рудкоўскую, якая была вылучана Радай “Беларускага Хельсінкскага камітэта”.

Нагадаем, што праблемы на працы ў спадарыні Рудкоўскай пачаліся пасля таго, як яна зарэгістравалася назіральніцай у акруговай выбарчай камісіі Пралетарскай акругі №17 па выбарах у абласны Савет. Яе, як старшыню ЖБК №8, абвінавацілі ў тым, што тэрыторыя, прылеглая да жылога дому гэтага кааператыву, засмечаная. Раней такіх праблемаў на працы ў Святланы Рудкоўскай ніколі не паўставала. У выніку незалежная назіральніца была аштрафаваная на суму адной базавай велічыні – 35 тысяч рублёў. Акрамя гэтага, на наступны дзень па позве Рудкоўская была выклікана ў адміністрацыю Ленінскага раёна, дзе кіраўнік аддзелу ЖКГ і добраўпарадкавання Аляксандар Архіпаў пагражаў ёй адміністрацыйнымі прадпісаннямі за нібыта іншыя парушэнні і палохаў адхіленнем з пасады і перадачай справы ў пракуратуру.   

“Праваабаронцы за свабодныя выбары”