Орша: АГП не будзе вылучаць сваіх прадстаўнікоў у кандыдаты

У Оршы прадстаўнікі большасці палітычных партый вырашылі прыняць удзел у выбарчай кампаніі. У дадзены момант ажыццяўляецца рэгістрацыя ініцыятыўных груп. Сярод асобаў, якія выказалі жаданне вылучацца кандыдатамі ў дэпутаты мясцовых Саветаў шляхам збору подпісаў, ёсць актывісты Ппартыі БНФ, Беларускай сацыял - дэмакратычнай партыі “Грамада”, аргкамітэта Беларускай сацыял-дэмакратычнай партыі (Народная Грамада).

Разам з тым, Аршанская гарадская арганізацыя партыі “Справядлівы свет” прыняла рашэнне вылучаць сваіх кандыдатаў толькі партыйнымі пратаколамі, а гарадское аддзяленне Аб'яднанай грамадзянскай партыі на сваім агульным сходзе сябраў пастанавіла наогул адмовіцца ад вылучэння кандыдатаў у сувязі з тым, што іх прадстаўнікоў не ўключылі ў тэрытарыяльныя камісіі.

Прадстаўленне дакументаў для рэгістрацыі ініцыятыўных груп завяршаецца ў чацвер 18 лютага.

“Праваабаронцы за свабодныя выбары”