Рэдакцыя газеты "Народная воля" падала ў гаспадарчы суд г. Мінска зыск супраць РУП "Белпошта", якое адмовілася ўключаць выданне ў падпісны каталог на 2006 год.

"Мы патрабуем ад суда прымусіць адказчыка заключыць дамову на распаўсюд газеты "Народная воля" на ўмовах, прадугледжаных аналагічнай дамовай на 2005 год", - заявіў галоўны рэдактар выдання Іосіф Сярэдзіч агенцтву БелаПАН.

Па яго словах, у бліжэйшых нумарах "Народнай волі" падпісчыкам выдання патлумачаць, якім чынам яны могуць адстаяць сваё права падпіскі на газету. "Мы проста дамо юрыдычную кансультацыю нашым чытачам. Пасля гэтага, я ўпэўнены, "Белпошта" атрымае тысячы аналагічных зыскаў ад нашых падпісчыкаў", - адзначыў І. Сярэдзіч. Ён выказаў упэўненасць, што выхад "Народнай волі" будзе працягвацца.