13 кастрычніка лідэра Беларускага кангрэсу дэмакратычных прафсаюзаў Аляксандра Ярашука выклікалі ў рэспубліканскую пракуратуру
Пракуратура Беларусі ўзяла тлумачэньні у лідэра Беларускага кангрэсу дэмакратычных прафсаюзаў Аляксандра Ярашука з нагоды яго заяваў наконт выступу Аляксандра Лукашэнкі на верасьнёўскім зьезьдзе Фэдэрацыі прафсаюзаў.
Аляксандр Ярашук паведаміў Радыё Свабода: “Мне прад’яўлена прэтэнзія, што я пашыраю інфармацыю, якая не знаходзіла свайго пацьверджаньня ў афіцыйных сродках масавай інфармацыі аб тым, што прэзыдэнт Лукашэнка, выступаючы 20 верасьня на зьезьдзе ФПБ, даваў даручэньні адпаведным асобам, маюцца на ўвазе старшыня канцэрну “Белнафтахім” Браніслаў Сівы і старшыня ФПБ Леанід Козік, пра тое, што трэба пакласьці канец незалежнаму прафсаюзнаму руху. Пыталіся, адкуль я ўзяў гэтую інфармацыю і ці магу пацьвердзіць яе”.
Ярашук не выключае магчымага перасьледу з боку праваахоўных органаў.
