Лагойскіх міліцыянтаў вінавацяць у катаванні падследнага

Пракуратура Лагойскага раёна пачала крымінальную справу на двух супрацоўнікаў міліцыі мясцовага РАЎС. Як паведамляе інтэрнэт-газета "Ежедневник", міліцыянтаў вінавацяць у тым, што яны ўжывалі катаванні да падазраванага ў здзяйсненні злачынства грамадзяніна.

Паводле папярэдніх звестак, прапаршчык і сяржант Лагойскага РАУС 11 жніўня 2009 года даставілі ў ізалятар часавага ўтрымання раней неаднаразова судзімага мясцовага жыхара. Яго падазравалі ў злачынстве. Каб атрымаць ад яго прызнанне, супрацоўнікі міліцыі пачалі жорстка яго збіваць.

Як пазней пацвердзіла судова-медыцынская экспертыза, у затрыманага было мноства цяжкіх целавых пашкоджанняў, і яму спатрэбілася медыцынская дапамога.

Пракуратура Лагойшчыны пачала крымінальную справу, вінаватым пагражае да дзесяці гадоў пазбаўлення волі.