viasna on patreon

Кіраўніка суполкі «Сведкі Іеговы» аштрафавалі на 1 мільён рублёў

2009 2009-08-13T17:33:12+0300 1970-01-01T03:00:00+0300 be Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

12 жніўня суддзя Чыгуначнага раёна Гомеля Віталь Козыраў пакараў штрафам кіраўніка рэлігійнай суполкі «Сведкі Іеговы» Юрыя Рашэтнікава.

 

Юры Рашэтнікаў прызнаны вінаватым у арганізацыі несанкцыянаванага масавага мерапрыемства ў прыватнай хаце і аштрафаваны на 1 мільён 50 тысячаў беларускіх рублёў, перадае «Радыё Свабода».

 

Рашэтнікаў пракаментаваў рашэнне суда наступным чынам:

 

«Атрымліваецца, што для таго, каб сустрэцца і абмяркоўваць біблейскія тэмы, неабходны дазвол. Аднак 31-ы артыкул Канстытуцыі якраз гарантуе свабоду веравызнання. Я лічу, што ў гэтым выпадку нашыя правы былі абмежаваныя».

 

Суддзя Віталь Козыраў матываваў сваю пастанову спасылкамі на сведчанні ў судзе супрацоўнікаў адміністрацыі Чыгуначнага раёна, якія ўвечары 21 ліпеня знаходзіліся пры штурме міліцыі прыватнай хаты ў 1-м завулку Крупскай. Па словах сведак-міліцыянтаў, сход у хаце нібыта арганізаваў Рашэтнікаў.

 

У пастанове суда таксама адзначана, што прыватная хата «абстаўленая для правядзення рэлігійных мерапрыемстваў, пастолькі стаялі лавы, мелася літаратура суполкі «Сведкі Іеговы», пастаўленыя калонкі з мікрафонам. Дазволу на правядзенне масавых мерапрыемстваў па пазначаным адрасе рэлігійная суполка «Сведкі Іеговы» не мела».

 

Юры Рашэтнікаў не прызнаў сваёй віны. Ён збіраецца аспрэчыць пастанову суда. Рашэтнікаў заявіў, што ў прыватнай хаце была сустрэча аднадумцаў, у тым ліку і чальцоў суполкі «Сведкі Іеговы». Арганізатарам яе ён не з'яўляўся, а прысутнічаў у якасці аднаго з удзельнікаў сустрэчы.

 

Нагадаем, што 21 ліпеня міліцыя сілай абшукала прыватную хату, дзе збіраліся вернікі і прыхільнікі неапратэстанцкай рэлігійнай суполкі «Сведкі Іеговы». Супрацоўнікі міліцыі пералезлі праз плот, адкрылі браму і зашлі на панадворак. Кіраваў аперацыяй маёр міліцыі Дзмітры Бондараў. Санкцыю на ператрус выдала пракуратура Чыгуначнага раёна.

 

Удзельнікі сустрэчы адмовіліся ўпускаць супрацоўнікаў міліцыі ў прыватную хату без яго ўладальніка. Але міліцыянты выклікалі мясцовых супрацоўнікаў МНС і з дапамогай «баўгаркі» распілавалі замок і ўвайшлі ў хату. Яны забралі музычную апаратуру і склалі супраць Юрыя Рашэтнікава пратакол аб парушэнні парадку арганізацыі масавага мерапрыемства.

Апошнія навіны

Партнёрства

Сяброўства