Каардынатар руху “Зубр” Мікіта Сасім падаў скаргу на незаконныя дзеяньні супрацоўнікаў АМАПу.

Зьбіты 16 верасьня супрацоўнікамі АМАПу каардынатар руху “Зубр” Мікіта Сасім знаходзіцца ў 9-ай клінічнай бальніцы з дыягназам “чэрапна-мазгавая траўма”.
17 верасьня М.Сасім напісаў заяву з патрабаваньнем прыцягнуць супрацоўнікаў АМАПу да адказнасці. Заяву прынялі супрацоўнікі Цэнтральнага РУУС г. Мінска.
Мікіта Сасім быў зьбіты 16 верасьня ў Мінску падчас акцыі “Мы памятаем”, прысьвечанай 6-ым угодкам зьнікненьня палітыка Віктара Ганчара і бізьнесьмена Анатоля Красоўскага. Апрача Мікіты Сасіма ў гэты дзень атрымалі траўмы рознай ступені цяжкасьці яшчэ шэсьць удзельнікаў.
Нагадаем, што затрыманні актывістаў “Зуброў” адбываліся ў гэты дзень і ў іншых гарадах.

Два актывісты руху “Зубр” былі затрыманыя ў Магілёве. Гэта Яўген Сувораў і Ўладзіслаў Бародка, якія раздавалі улёткі з інфармацыяй аб знікненнях грамадскіх дзеячоў у Беларусі, а таксама з інфармацыяй аб палітвязнях.