Уладзімер Лабковіч: "Судзьдзя дапамагала прадстаўніку Міністэрства юстыцыі"
Уладзімір Лабковіч
У Гарадзенскім абласным судзе адбылося слуханьне справы па скарзе на адмову ў рэгістрацыі Гарадзенскай абласной арганізацыі ГА БНФ "Адраджэньне". Інтарэсы ГА БНФ "Адраджэньне" прадстаўлялі адказны сакратар Управы Партыі БНФ Уладзімер Лабковіч і сябра Сойму Партыі БНФ Юры Чавусаў. Таксама на судовым паседжаньні прысутнічалі намесьнік старшыні Партыі БНФ Аляксей Янукевіч, сябры Сойму Вадзім Саранчукоў і Сяргей Мальчык, іншыя актывісты Партыі БНФ і праваабаронцы.
Хадайніцтва Уладзімера Лабковіча аб правядзеньні судовага працэсу на беларускай мове не было задаволена судзьдзёй. "Гэта моцна парушае мае правы, - сказаў Уладземер Лабковіч. - І ў гэтай адмове я бачу ганебную дыскрэдытацыю адной зь дзяржаўных моваў".
Падчас судовага працэсу У.Лабковіч і Ю.Чавусаў выказалі аргумэнты, сэнс якіх у тым, што адмова ў рэгістрацыі абласной арганізацыі ГА БНФ "Адраджэньне" была зробленая на падставе парушэньня правілаў справаводзтва са спасылкай на дакумэнт, які ў той час яшчэ не ўступіў у законную сілу.
Рашэньне будзе аб'яўлена заўтра ў 9:00.
"Хада судовага працэсу, паводзіны сыдзьдзі, якая адкрыта дапамагала прадстаўніку Міністэрства юстыцыі, паказалі, што ў Беларусі немагчымая рэгістрацыя структураў грамадзкіх аб'яднаньняў. Рэгіструючыя органы не спрыяюць, а стараюцца падавіць і зьнішчыць любыя праявы грамадзкай актыўнасьці", - пракамэнтаваў Уладзімер Лабковіч.
