Паўла Кур’яновіча суд пакараў штрафам
фота svaboda.org
Сёння, 14 траўня, суд Першамайскага раёну Менску аштрафаваў актывістам “Маладога Фронту” Паўла Кур’яновіча на 10 базавых велічыняў. Маладафронтаўца прызналі вінаватым у адміністратыўным правапарушэнні па арт. 23.34 КаАП РБ - парушэнне парадку арганізацыі і правядзення масавых мерапрыемстваў.
Павал Кур’яновіч быў затрыманы супрацоўнікамі міліцыі 12 траўня на праспекце Незалежнасці. Падчас затрымання ў яго знайшлі інфармацыйныя ўлёткі з заклікам прыйсці на Марш “За незалежнасць!”, запланаваны на сёння, 14 траўня. Разам з Кур’яновічам была затрыманая актывістка арганізацыі Вікторыя Ладзіс.
Маладафронтаўцаў даставілі ў РУУС Першамайскага раёна. На Кур’яновіча склалі пратакол аб адміністратыўным правапарушэнні. Да суду актывіст знаходзіўся ў РУУС.
Непаўнагадовую Вікторыя Ладзіс праз тры гадзіны адпусцілі без складання пратаколу.
