Суд над актывістамі АГП у Ваўкавыску пакуль не адбыўся

2 верасня ў Ваўкавыскі раённы суд выклікалі двух мясцовых актывістаў АГП Аляксандра Барадаўкіна і Віталя Гуляка, на якіх былі складзеныя пратаколы аб удзеле у несанкцыянаваным пікеце 27 жніўня — падчас паўторнага правядзеньня 6-га зьезду Саюзу палякаў, паведаміла радыё Свабода.

Абодва партыйцы ў суд не зьявіліся. Як патлумачыў гарадзенскі лідэр АГП Юры Істомін, была парушана працэдура ўручэньня судовай позвы.

А.Барадаўкіну і В.Гуляку ўкінулі позвы ў паштовыя скрынкі, хаця павінны былі ўручыць ім асабіста ці іхнім родным. А па-другое, зазначыў спадар Істомін, у той дзень партыйная арганізацыя не была гатова забясьпечыць адвакацкую абарону ў судзе двум сваім актывістам.