Уладзімір Лабковіч: Нерэгістрацыя “Нашай Вясны” – гэта цалкам палітычнае рашэнне

Сёння па нашай ініцыятыве мы атрымалі на рукі (таму што па пошце дакумент яшчэ не мог дайсці, бо датаваны 2-ім сакавіка) рашэнне Міністэрства юстыцыі аб адмове нам у рэгістрацыі. Варта адзначыць, што само рашэнне нам паступіла ў парушэнне дзеючага заканадаўства пазней устаноўленага Законам тэрміна аб прадстаўленні такога адказу. Дакумент утрымлівае звыш 10 пунктаў, на падставе якіх нам, правабаронцам,  адмоўлена ў дзяржрэгістрацыі грамадзкага аб’яднання. Збольшага ўсе гэтыя пункты абсалютна надуманыя і неабгрунтаваныя тымі дакументамі, якія мы прадставілі ў Мінюст. Акрамя таго, у адмове няма адпаведных спасылак на тыя заканадаўча-нарматыўныя акты, якія намі парушаныя. Між тым сярод указаных парушэнняў, якія быццам бы мелі месца, калі прытрымлівацца нормы Закону, яны абсалютна не адпавядаюць тым прэтэнзіям, выкладзеным нам Мінюстам. І пра ўсё гэта мы будзем казаць у Вярхоўным Судзе.

Тут жа трэба даць іншую адзнаку. Тое, напрыклад, што адной з падставаў нашай нерэгістрацыі (я на гэта хачу звярнуць увагу) з’яўляецца прыцягнене да адміністратыўнай адказнасці шэрагу заснавальнікаў ГПА “Наша Вясна” – такая падстава для адмовы ўжо не ўпершыню вылучаецца нам. Так было ў 2007 годзе, і гэта сведчыць аб тым, што сама ўлада, якую у дадзеным выпадку прадстаўляе Мінюст, прызнае спіс людзей, (і падае гэты спіс ў сваім рашэнні), якім яна фактычна беспадстаўна забараняе, нібыта грунтуючыся на законе, у праве на стварэнне арганізацыі, праве на ажыццяўленне грамадзкай дзейнасці. Гэта прамое парушэнне міжнароднага замацаванага права на асацыяцыю.

Таксама ў рашэнні Мінюста ўказана ў якасці падставы для нашай нерэгістрацыі тое, што асоба-заснавальнік абвінавачваецца ў крымінальным злачынстве па арт.130 КК – распальванне рэлігійнай варожасці. Сапраўды віцебскі праваабаронца Леанід Свецік зьяўляўся падазраваным па крымінальнай справе, аднак гэтая справа ў дачыненні да сп. Свеціка прыпынена. Між тым, мы ў сваю чаргу неаднаразова звярталі ўвагу на тое, што разглядаем яе як палітычна матываваную крымінальную справу, і таму віталі яе прыпыненне. Зараз следчых дзеянняў па гэтай справе не вядзецца, мы разлічваем, што яна будзе цалкам спынена. Але Мінюст ужо апрыоры вызначыў Леаніда Свеціка вінаватым, і мала таго, лічыць гэта адной з падставаў для адмовы нам у рэгістрацыі арганізацыі.

Зразумела, што гэта цалкам палітычнае рашэнне. Патрабаванне, заклік да нашай рэгістрацыі выказвалі шматлікія міжнародныя арганізацыі, заклік да рэгістрацыі “Нашай Вясны” утрымліваецца ў рэзалюцыі Еўрапарламента. Тое, што чалавеку, у дачыненні да якога літаральна паўгады таму былі часова прыпыненыя санкцыі аб забароне на ўезд у краіны Еўразвязу – а менавіта сп. Харытону даручаюць рэгістрацыю “Нашай Вясны”, і ён яе зноўку не рэгіструе, сведчыць, што ўлады наўмысна, цынічна паказваюць як беларускаму грамадству, так і міжнароднай супольнасці, што яны не збіраюцца не толькі выконваць патрабаванні, якія ёсць, але і дэманстратыўна збіраюцца надалей парушаць правы грамадзян у Беларусі. Таму я вельмі спадзяюся, што на гэты выпадак, на гэтую дэманстрацыю зверне ўвагу міжнародная супольнасць, міжнародныя інстытуты і зробяць адпаведныя высновы па тым, наколькі шчырыя памкненні беларускіх уладаў выконваць свае абавязацельствы ў галіне правоў чалавека ў Беларусі.