Затрыманыя апазіцыянеры Уладзімер Кацора і Уладзімер Сякерка за парушэньне "памежнага рэжыму"
Радыё Свабода паведаміла, што 18 жніўня ў Лоеве міліцыя затрымала намесьніка старшыні абласной арганізацыі АГП Уладзімера Кацору і сакратара абласной арганізацыі камуністаў ПКБ Уладзімера Сякерку. Яны нібыта парушылі "памежны рэжым".
Затрыманьнем кіраваў сам начальнік райаддзелу міліцыі маёр Хмелянок. Партыйных актывістаў абвінавачваюць у парушэньні правілаў уезду ў памежную зону. (Лоеўскі раён мяжуе з Украінай.)
Пры ўезьдзе ў райцэнтар міліцыя і памежнікі спынялі аўтамашыну з актывістамі апазыцыйных партыяў. Цікава, што спадары Кацора і Сякерка паказалі камандзіровачныя пасьведчаньні і іх першапачаткова прапусьцілі, але затым – усё ж затрымалі, старшы лейтэнант памежных войскаў Уладзімер Дземідзенка склаў адміністрацыйныя пратаколы парушэньня ўезду ў памежную зону.
