Барысаўскія апазыцыянэры патрабуюць спыніць ціск супраць недзяржаўных газэтаў.

12 жніўня а палове на шостую ў Барысаве пачалася акцыя ў знак падтрымкі незалежных газэт “Барысаўскія навіны” і “Курьер из Борисова”, паведаміла радыё Свабода. Гэтым выданьням спачатку адмовілі распаўсюд празь дзяржаўную сетку, а потым забаранілі прыватным прадпрымальнікам гандляваць незалежнымі выданьнямі на вуліцы. Калектывы рэдакцый амаль штодня наведваюць суд, бо там ідзе разгляд пазоваў супраць газэтаў.
На цэнтральную плошчу Барысава насупраць будынку гарвыканкаму выйшлі калектывы рэдакцый “Барысаўскіх навін” і “Курьер из Борисова”, а таксама некалькі дзясяткаў актывістаў моладзевага руху “Зубр”, Маладога Фронту, аб’яднаньня “Волат”. Яны трымалі ў руках асобнікі незалежных газэт, якія карыстаюцца попытам у жыхароў Барысава.
Нягледзячы на халоднае надвор’е й тое, што акцыя адбывалася напрыканцы працоўнага тыдня, на плошчу прыйшлі некалькі дзясяткаў грамадзянаў падтрымаць калектывы недзяржаўных выданьняў.