Ці зарэгіструюць баранавіцкую філію ГА «БАЖ»?

Пытанне «аб адмове ў пастаноўцы на ўлік баранавіцкай філіі ГА “Беларуская асацыяцыя журналістаў”» значылася ў павестцы дня паседжання Баранавіцкага гарвыканкама, якое адбылося 20 студзеня.

Адказным за падрыхтоўку пытання быў аддзел ідэалагічнай працы (кіраўнік — Таццяна Жытко).

Заяву аб рэгістрацыі сваёй філіі Баранавіцкія сябры БАЖ накіравалі ў мясцовую адміністрацыю ў кастрычніку 2008 года. Напрыканцы лістапада прыйшоў адказ, што прадастаўленыя паперы неабходна прывесці ў адпаведнасць з дзеючым заканадаўствам у месячны тэрмін. 22 снежня выпраўленыя дакументы паўторна падалі ў гарвыканкам.

Такім чынам, днямі баранавіцкія сябры ГА «БАЖ» чакаюць пісьмовага адказу ад мясцовых уладаў.

«Аднак пасля такой адназначнай пастаноўкі пытання — “аб адмове…”, а не, скажам, “аб разглядзе пытання аб пастаноўцы на ўлік”, спадзяванняў на станоўчы адказ практычна няма», — зазначыў у гутарцы з карэспандэнтам службы маніторынгу БАЖ адзін з ініцыятараў звароту ў гарвыканкам.