viasna on patreon

Газета «Борисовские новости» пазбаўлена магчымасці друкавацца і распаўсюджвацца

2009 2009-01-06T13:39:00+0200 1970-01-01T03:00:00+0300 be

З пачатку новага года недзяржаўная грамадска-палітычная газета «Борисовские новости» (Мінская вобл.) пазбаўлена магчымасці друкавацца, а таксама распаўсюджвацца праз уласную гандлёвую сетку. У снежні прыватная друкарня «Плутас-Маркет» (Мінск), дзе друкавалася апошнія гады рэгіянальнае выданне, паведаміла рэдакцыі «БН», што са студзеня 2009 года скасоўвае дамову аб супрацоўніцтве. У сувязі з «сусветным фінансавым крызісам», — патлумачыла кіраўніцтва друкарні.

«У апошнім лісце з друкарні паведамляецца, што мы нібыта несвоечасова разлічваліся за выпуск нумару. Я ім напісаў, што друкарня ніколі не выстаўляла нам прэтэнзій па аплаце паслуг, і зараз чакаем іх адказу», — паведаміў у гутарцы з прэс-службай БАЖ галоўны рэдактар «БН» Анатоль Букас.

Між тым, з 30 снежня Барысаўскі райвыканкам па рэкамендацыі падаткавай інспекцыі адабраў ліцэнзію на раздробны гандаль перыядычнымі выданнямі ў выдаўца «Борисовских новостей» – прыватнага ўнітарнага прадпрыемства «Букас медиа-центр».

Дзеянні мясцовых уладаў А. Букас лічыць неабгрунтаванымі, і ён накіраваў зыскавую заяву ў Гаспадарчы суд Мінскай вобласці з патрабаваннем адмяніць рашэнне выканкама аб ануляванні гандлёвай ліцэнзіі.

«Такім чынам, заблакаваная праца нашага прадпрыемства — сёння мы не можам ні друкаваць газету, ні прадаваць яе, — абураецца сітуацыяй Анатоль Букас. — Наш калектыў хоча нармальна працаваць і нармальна плаціць падаткі, а нам перашкаджаюць гэта рабіць. Між тым, за мінулы год мы заплацілі ў бюджэт краіны 346 млн. рублёў падаткаў.

Нагадаем, што больш за 3 гады газета «Борисовские новости» разам з іншымі недзяржаўнымі выданнямі пазбаўлена магчымасці распаўсюджвацца праз падпіску «Белпошты» і сетку кіёскаў «Саюздруку».

Апошнія навіны

Партнёрства

Сяброўства