Апазіцыянеру вынеслі папярэджанне за супрацоўніцтва з “Белсатам”
Прадстаўніку дэмсілаў з Гомельскай вобласці Кастусю Жукоўскаму даслалі ліст з пракуратуры Веткаўскага раёна, у якім яго папярэджваюць аб недапушчальнасці супрацоўніцтва з польскім тэлеканалам “Белсат”.
Як паведаміў БелаПАН К.Жукоўскі, у лісце паведамляецца, што пракуратура праводзіла праверку па заяве старшыні райсавета дэпутатаў Яўгена Чэванькова. У папярэджанні гаворыцца, што актывіст парушае закон, падаючы матэрыялы для замежнага сродку масавай інфармацыі, не акрэдытаванага ў Міністэрстве замежных спраў Беларусі. У выпадку ўсталявання паўторных фактаў супрацоўніцтва з дадзеным СМІ Канстанцін Жукоўскі будзе прыцягнуты да адказнасці.
“Я балатаваўся ў парламент па гэтай акрузе і сапраўды сёе-тое здымаў для сябе на камеру. Я грамадзянін Беларусі, таму маю права па канстытуцыі перадаваць сабраную мной інфармацыю любому каналу — ці то БТ, CNN або РТР”, — пракаментаваў сітуацыю актывіст.
